ගිනි අවි, මත් කුඩු සමග ලාංකීය ධීවරයෝ 6 ක්‌ ඉන්දීය අත්අඩංගුවට
මිලිමීටර් 9 වර්ගයේ ගිනි අවි පහක් සහ මත්ද්‍රව්‍ය කිලෝග‍්‍රෑම් සියයක තොගයක් රැගෙන යාත‍්‍රා කරමින් තිබූ මෙරට බහුදින ධීවර යාත‍්‍රාවක් ශ්රී ලාංකිකයන් හය දෙනකුද සමගින් ඉන්දීය වෙරළාරක්‍ෂක බළකාය මගින් අත්අඩංගුවට ගෙන තිබෙනවා.
දින දහයක පමණ කාලයක් තිස්සේ ඉන්දීය වෙරළාරක්‍ෂක බළකාය සිදු කළ මෙහෙයුමකින් අනතුරුව පෙරේදා (25 වැනිදා) තූත්තුකුඩියට දකුණින් වූ ගැඹුරු මුහුදේදී මෙම යාත‍්‍රාව අත්අඩංගුවට ගෙන ඇත.
අත්අඩංගුවට ගත් පිරිසෙන් සිදු කළ ප‍්‍රශ්න කිරීම්වලදී පවසා ඇත්තේ පාකිස්තානයේ කරච්චි නුවරට ආසන්න ගැඹුරු මුහුදේදී පාකිස්තාන නෞකාවක් මගින් බටහිර රටවලට බෙදා හැරීම සඳහා මෙම මත්ද්‍රව්‍ය තොගය ලබාදුන් බවත්, තමන් එම මත්කුඩු තොගය ඇතුළු ද්‍රව්‍ය ඔස්ට්‍රේලියාව ඇතුළු බටහිර රටවල් වෙත රැගෙන යමින් සිටි බවත්ය.
අත්අඩංගුවට ගත් සැකකරුවන් අදාළ මත්ද්‍රව්‍ය තොගය සහ ගිනි අවි ප‍්‍රවාහනය කරනු ලැබුවේ, බටහිර රටවලට රැගෙන යෑමටද නැතහොත් මෙරට මහා පරිමාණ කුඩු ජාවාරම්කරුවකුගේ සැලසුමකට අනුව ශ්රී ලංකාවට රැගෙන ඒමේ අරමුණින්දැයි, අනාවරණය කර ගැනීමට ශ්රී ලංකා පොලිසිය විශේෂ විමර්ශනයක් අරඹා තිබෙනවා.
