මධ්‍යම අධිවේගයේ දුෂණ කෝප් කමිටුවේදී හෙළිවෙයි.
මධ්‍යම අධිවේගී මාර්ගය ඉදි කිරීමේදී අක්‍රමිකතා රැසක් සිදුවී ඇති බව පොදු ව්‍යාපාර පිළිබඳ කාරක සභාව හෙවත් කෝප් කමිටුව ඊයේ පාර්ලිමේන්තුවේ දී රැස්වූ අවස්ථාවේ දී අනාවරණය වී තිබෙනවා.
මාර්ගයේ ශක්‍යතා අධ්‍යයනයට පමණක් රුපියල් බිලියන 1.7 කට වැඩි මුදලක් වැය වී ඇති බව අනාවරණය වී ඇති අතර මධ්‍යම අධිවේගී මාර්ගයේ කඩවත සිට මීරිගම දක්වා පළමු කොටසේ වැඩ කටයුතු ආරම්භ වීම 2015 සිට 2019 දක්වා ප්‍රමාද වීම නිසා රුපියල් බිලිය 8ක මූල්‍ය අලාභයක් සිදුව ඇති බව එහිදී අනාවරණය වී තිබෙනවා.
ශක්‍යතා අධ්‍යයනය සඳහා සමාගම තෝරාගැනීම ප්‍රසම්පාදන ක්‍රියාවලියකින් තොරව සිදුව ඇති බව අනාවරණය වී ඇති අතර 2012 දී උතුරු අධිවේගී මාර්ගය ලෙස පියවර 3 ක් යටතේ පැවති ව්‍යාපෘතිය 2015 වර්ෂය වන විට මධ්‍යම අධිවේගී මාර්ගය ලෙස පියවර 4 ක් යටතේ වෙනස් වී තිබෙනවා.
තවද මධ්‍යම අධිවේගී මාර්ගයේ වර්තමාන තත්ත්වය කෝප් සභාපතිවරයා විමසූ අතර එහිදී අනාවරණය වී ඇත්තේ කඩවත – මීරිගම කොටසේ වැඩ කටයුතු සියයට 5 ක ප්‍රමාණයක අවසන් වී ඇති බවයි.
මීරිගම සිට කුරුණෑගල දක්වා සියයට 75 ක් වැඩ කටයුතු අවසන් වී ඇති අතර එම කොටසේ ඉදිකිරීම් ලබන වසරේ ජුනි මාසය වන විට අවසන් කළ හැකි බව මහාමාර්ග අමාත්‍යාංශයේ ලේකම්වරයා කෝප් කමිටුව හමුවේ ප්‍රකාශ කර තිබෙනවා.
මෙලෙස මුල් ව්‍යාපෘතිය වෙනස් වීම නිසා සිදුවූ මූල්‍ය අලාභය පිළිබඳ වාර්තාවක් වහාම ලබාදෙන ලෙස කෝප් කමිටුවේ සභාපති මහාචාර්ය චරිත හේරත් මහතා මහාමාර්ග අමාත්‍යාංශයේ ලේකම්වරයාට නියෝග කරනු ලැබුවා.
